وێنووسه‌که‌م

        به‌هاری پڕ نه‌شه‌ و شنه‌م

                به‌ چاوی مه‌ستت سوێند ده‌ده‌م

به‌ جێم مه‌‌هێڵه وا مه‌ڕۆ

        مه‌ڕۆ، ده‌مه‌مکه‌ ره‌نجه‌ڕۆ

* * *  *

  وه‌ره‌ به‌ لار و له‌نجه‌که‌ت

        به‌ تیشکی زه‌رده‌ خه‌نده‌که‌ت

                     له‌ رۆچنێکی نادیار

                     هه‌واره‌ چۆل و هۆڵه‌که‌ی

                              دڵی پڕم گزینگ پژین که‌ جا بڕۆ

 * * * *

له‌ پیاڵه‌ی بلووری چاوه‌ مه‌سته‌که‌ت

               به‌ ده‌ستی نه‌رم و لۆکه‌ییت

ده‌تێکه‌ بۆم

    له‌ جامی مه‌ی

که‌ باده‌ی خوداییه‌

    زوڵاڵتر له‌ ئاوی کانی و

           گه‌شاوه‌تر له‌ ئه‌و دڵه‌ی

که‌ بۆ ژیانی سه‌ربه‌خۆ

                   وه‌کوو شه‌پۆلی پڕخرۆش

     به‌هاژه‌یه‌

        له‌ هه‌ڵس و که‌وت و

توڕه‌یه‌

     هه‌دا و ئۆقره‌ی نییه

              ده‌با هه‌لا هه‌لا بێ ئاوه‌زو مژم

به‌ گشت ده‌مارما گه‌ڕێ

           به‌ گێژی و وڕی

                 سه‌رم بنێمه‌ سه‌ر سه‌رین

له‌ بیر به‌رم

    په‌ژار و ئێش و ژاری ژین

      * * * *

به‌ به‌ژن و لارت سوێند ده‌ده‌م

                هه‌وارم چۆل و هول مه‌که‌

      به‌ جێم مه‌هێڵه‌ نازه‌نینه‌که‌م

گوڵی به‌هاری ژینه‌که‌م

         به‌ له‌نجه‌که‌ و

قاسپه‌ قاسپه‌ خه‌م ره‌وێنه‌که‌ت

                     زه‌نا زه‌نایه‌ ساز بکه‌

            له‌ خانووچکه‌ی دڵی کڕی شه‌وم دووباره‌ بمهه‌ژێنه‌وه‌

هه‌تا کوو تاوێ نه‌سره‌وم

               هه‌تا هه‌ڵۆی ژیانه‌که‌م

      به‌ جێ ده‌هێڵێ

                  ده‌گه‌م به‌ ئاره‌زووی گه‌شم

‌‌